Ақтауда «ShubatFest» фестивалі өтті

Ақтау қаласында дәстүрлі сусын – түйе сүтінен дайындалатын шұбатты кеңінен насихаттауға, отандық өндірушілерді қолдауға және түйе сүті негізіндегі өнімдер өндірісін дамытуға арналған «ShubatFest» фестивалі өтті.

Фестиваль аясында ұйымдастырылған байқаудың қазылар алқасының жұмысына Ұлттық сараптама орталығының өкілдері белсенді қатысты. Қазылар алқасының құрамына Стратегиялық даму және халықаралық ынтымақтастық департаментінің директоры Т.К. Ерубаев, сондай-ақ Департамент мамандары Ж.Т. Толысбаева және М.С. Қайрақбаева кірді.

Байқау жеңімпазын анықтау үш кезең бойынша жүргізілді.

Бірінші кезеңде өнімге Кәсіпорынның Маңғыстау облысы бойынша филиалы тарапынан зертханалық сараптама жүргізілді. Одан әрі өнімді кәсіби қазылар алқасы бағалады. Қорытынды кезеңде фестивальге келген келушілердің қатысуымен халықтық дауыс беру өткізілді.

Фестиваль барысында Ұлттық сараптама орталығының өкілдері жергілікті бұқаралық ақпарат құралдарына сұхбат берді. Өз сөздерінде олар шұбаттың ерекше мәдени және ұлттық маңызын атап өтіп, тұтынушыларға ұсынылатын өнімнің қауіпсіздігі мен жоғары сапасын қамтамасыз етудің маңыздылығына тоқталды.

Іс-шара аясында саланы одан әрі дамыту мәселелеріне де ерекше назар аударылды. Бұл бағыттағы маңызды қадамдардың бірі – «Алиментариус Кодексі» комиссиясы аясында тиісті халықаралық стандартты әзірлеу процесі.

Аталған бастамаларды іске асыру шұбат өндірісін жетілдіруге, өнімнің сапасы мен қауіпсіздігін арттыруға, отандық өндірушілердің бәсекелестік позицияларын нығайтуға, сондай-ақ қазақстандық өнімнің халықаралық нарықтарға шығу мүмкіндіктерін кеңейтуге қосымша жағдай жасайды.

Сурет галереясы